獅子山下獎學金：唯真為善 薪火相傳 -- "擇"星篇

話說遠在今年年頭，當我喺度諗緊可以做啲咩驚天大動作幫獅子山下獎學金CREATE多啲NOISE嘅時候，就諗到應該善用我地嘅人脈同技能，拍一條宣傳片，用途有兩個：1) 俾多啲香港人知道我地嘅存在；2) 用對白去引導學生思考到底可以做啲咩作品出嚟（BEHIND THE SCENE可以睇呢篇)。

要達成第1點，一定要搵啲人人都識嘅面孔。我第一個諗到嘅，係當時最HIT最富話題性嘅男神王宗堯。同我地其中一個成員小飛所講一樣，自從王宗堯張戴頭盔走到前線嘅相面世開始，我心入面就真心佩服同記住呢位咁有GUTS嘅演員。草擬拍片當時《選戰》啱啱開始播映，加上王宗堯本身嘅形象同立場我個人覺得非常配合我地獎學金捍衞香港核心價值嘅理念，所以人氣高企嘅佢係不二之選。喺會議上，我提出話搵男神幫手，令人震驚地，竟然有近一半嘅成員話唔知佢係邊個，原因係無睇HKTV... 不過喺稍作介紹之後，大家都對呢個提議無乜CONCERN。可能男神當時未係好似宜家咁，有咁多廣告咁多曝光，但宜家我地全員都覺得佢嘅出現真係幫咗好大嘅忙。

同時間，我地有諗過搵男神喺劇中嘅對手、亦係HKTV當紅人物、同時都係浸大傳理學院嘅客席講師，智叔廖啟智，可惜智叔未能答應抽空幫忙，如果可以搵到智叔嘅話，話題性一定更大（雖然當時係想食住《選戰》條水，但其實短片前期準備時間我地想像嘅長）。

之後就到我地嘅師弟柳爺柳俊江。去年聖誕節同佢交收捐款支票當日同佢提及過有關拍片嘅嘢，佢當時話幫到忙嘅一定幫，所以我一定搵返佢幫忙。

然後執行委會員各人都提出咗好多有份量又廣為人知嘅名人，包括咗我諗好多80後都會識嘅呂秉權、仲有議事論事嘅曾志豪，呢兩位本身都係傳理校友，所以絕對係PERFECT MATCH，仲要我地又真係有成員同佢地有聯絡！後來我地繼續諗仲有無啲猛人係我地傳理校友，如果搵到佢地幫手一定更有聲勢，於是，膽粗粗走去搵旦哥鄭丹瑞，又成功咗！知道佢會幫手嗰下真係好驚喜！

另外因為我地嘅獎學金並唔係一個新聞獎學金，而係傳理獎學金，當中包括嘅唔只係新聞，仲有廣告同電影，有見及此都想搵啲同表演藝術有關、唔一定要喺電視出現嘅名人撐下場，Maggie舉手提議彭秀慧，轉個頭就話佢OK無問題喇！

最後數埋數埋有六粒星，我地都覺得好夠用，但去到準備開始拍攝嘅時候，又發現咗有啲好敢言嘅名人出現咗，其中一位俾我「睇中」嘅，係大佬孝邵仲衡。同樣地我又喺會議入面提出不如加埋邵仲衡，好有趣地大家嘅反應同當日我提出用王宗堯嗰陣好相似，竟然有差唔多一半嘅成員話唔識佢、無睇大時代，或者話分唔到佢同麥包麥長青！哈哈哈！不過又稍作介紹同埋即時用手機問谷哥大佬孝有咩言論之後，大家都再一次無乜CONCERN咁同意咗可以試下搵佢，最後MAGGIE經身邊好友搭路攞到佢電話，厚住面皮打俾大佬孝，介紹我地獎學金嘅理念，結果得到力撐，拍攝當日仲不停鼓勵我地繼續盡力去做應做嘅事！

然後去到同導演Leecat（我地傳理師弟）第一次開會嘅時候，佢又以另一個角度提議咗唔同嘅名字俾我地，當中我地都覺得好合適而又有成員可以搵到佢嘅，就係後會有期之後宜家唱埋《中東與綜》嘅方健儀！我地聯絡方健儀嘅時候佢啱啱去咗旅行，但已經話會幫手，返到嚟無耐就即刻上STUDIO錄影，非常爽快！

獅子山下獎學金，或者喺大家眼中或多或少係有一種顏色，所以唔少藝人或者公眾人物都避免被染色影響形象或者生計，盡量都唔會太高調支持，難得以上八位（仲有啲答應會幫忙但時間上未能配合嘅名人，話唔定遲啲會見到佢地出現㗎）肯表態兼用行動支持我地，真係萬分榮幸同感動。

唔知下次獅子山下獎學金又會用咩方式去令大家感動同驚喜呢？

獅子山下獎學金：唯真為善 薪火相傳 -- 文字篇

呢幾日，我聽得最多嘅，係以下：

獅子山下，高樓林立，人人埋頭苦幹，營營役役。
有無諗過，當你企喺獅子山上，
你，又會見到一個點嘅香港？

如果你未知呢段對白係咩一回事，可以CLICK下面條片睇咗先。

「獅子山下，高樓林立，人人埋頭苦幹，營營役役。有無諗過，當你企喺獅子山上，你，又會見到一個點嘅香港？」捐款方法...
Posted by 獅子山下獎學金 Lion Rock Scholarship on Tuesday, 11 August 2015

上面短片中嘅對白，都係由我執筆。回想一下，我第一次寫對白稿，係遠在12年前，為勞工處展翅計劃及青少年見習就業計劃宣傳片撰寫，隨後就有某老牌纖體健身中心嘅廣告片。

今次呢篇文字，其實費索思量咗好耐，因為，呢件事太重要，我想表達嘅訊息又要小心拿捏，又要用懶有深度嘅包裝，所以係有少少玩自己。

初稿嘅文字同出街版本好唔同，因為中途轉咗第二個玩法，所以又要做微調，加上最後又因為星嘅數量有增加（關於揀選明星嘅過程，下篇再交代），又要再加多一組對白，我自我感覺捉蟲。但為咗成就呢件事，捉多幾條都無所謂！

最初嘅想法，係以「假如我是獅子山」為貫通全片嘅對白，寓意如果我變成獅子山，從另一個全新角度去窺探香港的話會睇到啲咩。我想傳遞嘅訊息，係要大家知道社會上有好多現象嘅真相都未必咁易俾大家見到，要靠有良知嘅傳媒用心去探討再如實向公眾傳播開去先會被揭盅。所以一開始想寫嘅，係自打嘴巴嘅對白，講述風光背後嘅黑暗，或者悲痛背後嘅感人一面。

假如我是獅子山，我會見到繁榮背後嘅潦倒落泊。
(身光頸靚嘅中環人 VS 露宿街頭嘅無業人士)

假如我是獅子山，我會見到成功背後嘅血水和汗水。

(各種享譽國際嘅成就同建設 VS 出賣勞力嘅勞動階層)

假如我是獅子山，我會見到華燈嘅冷漠。

(維港兩岸璀燦景色 VS 低頭族嘅眾會)

假如我是獅子山，我會聽到吶喊背後嘅捨身精神。

(紛亂激動嘅示威同抗爭 VS 集會會場中無私嘅助人精神)

假如我是獅子山，我會見到辛酸背後嘅天倫之樂。

(目光呆滯神情疲憊嘅上班族  VS 一家大細開心散步)

假如我是獅子山，我會聽到歡呼嘅虛偽。

(官方活動觀眾搖旗呼歡 VS 俾錢買支持者)

假如我是獅子山，我會見到正義嘅麻木不仁。
(執法者 VS 盲目胡亂執法)

以上種種矛盾，正正係今日香港人心知嘅現況，但仲有好多人未睇清楚，所以我想師弟妹們可以從呢啲角度去搵出真相。

但呢種好大CONTRAST嘅玩法，去到預備拍攝之前，因為幸福藥業出嘅獅子山精神廣告問世，然後被我自己BAN咗。我唔想條片出嚟個效果同個MOOD似前者，刻意避開抄襲之嫌（安全啲好）。所以，決定改對白。

由本來嘅強烈正反對比，改成兩個層次嘅相輔相承。講面嗰層，再講底嗰層。面嗰層即係當權者想你睇到，或者盲嘅都睇到嗰層，底嗰層即係面嗰陣無講哂你聽嘅部份事實。要底同面兩層睇哂，你先可以見到全貌。而本來「假如我是獅子山」嘅概念，亦因為擔心好似太過CUTE而放棄，改成文章一開始引用嗰段開場白，意指大家平時慣咗耷低頭求其睇到皮毛就算，如果你企咗上獅子山用另一個角度去睇嘅時候又會唔會有啲新嘅體會？

正式版對白全文：

獅子山下，高樓林立，人人埋頭苦幹，營營役役。

有無諗過，當你企喺獅子山上

你，又會見到一個點嘅香港？

我會見到繁華嘅生活，

亦會見到辛勞嘅血汗。
(有勞動階層嘅付出先會有光鮮嘅繁華虛榮，繁華並不能忘本)

我會見到成功同掌聲，

亦會見到生活嘅艱難。
(有刻苦努力先會有成功同讚賞，成就不是源自僥倖而是努力)

我會見到一個國際都會，

亦會見到熟悉嘅家園。
(有人情味嘅家園先可以成為國際知名嘅文明都會，唔能夠只為國際形像而無視安居嘅重要性)

我會見到香港人對文化嘅包容同多元，

亦都見到香港人對公平嘅渴求同堅持。
(有渴望平等嘅心先可以達至包容同多元，不可能只講包容而忘記公平公義)

我會見到社會高速發展，

亦會見到香港嘅良知同熱情。
(有香港人嘅良心同拼搏先可以令社會進步，但追求高速發展同時唔可以放棄作為香港人嘅良知)

一件事有好多面，

你願唔願意用不同角度，

去看得更多、更真？

唯真為善，薪火相傳。

請支持

獅子山下獎學金。

感覺上同第一版本好似，但其實有微妙嘅分別。唔再將兩者變成相對嘅兩面，而係不可分割嘅表層同底層，要有底層去支持，表層先會成形。（當中有兩句明顯同其他唔同，原因係拍攝嗰陣被臨時修改...　我都係睇到剪片先知，不過效果都唔錯，因為係男神講嘅！）

結尾段「唯真為善，薪火相傳」，即係本文嘅標題，其實又係喺一個無特別思考嘅情況下爆出嚟嘅經典，結果好好用，大家都好鐘意。「唯真為善」係浸大傳理學院嘅院訓，「薪火相傳」係我作為一個老鬼去搞呢個獎學金嘅時候心入面想做到嘅嘢。呢兩組好似唔相關嘅詞語，拼埋一齊之後，同獅子山下獎學金八字又好夾喎，我好LIKE。

我唔識拍片，我亦唔會識得好多名人（八粒星入面我只能夠搵到RYAN柳俊江幫手），我能夠做嘅，就係運用我嘅專業同經驗，去為呢條片度好個方向，諗好個MESSAGE，用我對手寫好份SCRIPT。

老實講，由第一日決定要搞獅子山下獎學金開始，我一直抱住同一個態度－我只係做一啲我覺得應該做同想做嘅事，所以就算係幾艱難幾花精神時間，我都會做好佢。唔係，正確嚟講，呢個態度早在舊年九月尾已經一路擺明堅持到宜家。你懂的。

最後老套都補返句，請支持獅子山下獎學金。